Aqueste document que vos presentam nasquèt lo 13 d’agost de 2021, al Vendrelh (Bas Penedés). Ailà nos amassèrem Jaume Figueras (l’occitanista degan de Catalonha), Joan Maria Jaime (latinista, especialista en romanés, estudiós de l’occitan) e un sirvent, que sotasigna. En dinnant, parlèrem de las librariás en Occitània ont i aviá en venda de libre occitan; Jaume ne coneis maitas, e Joan e ieu, paucas, e doncas sortiguèri mon pichon casèrn de nòtas e escriguèri çò qu’èra nòu per ieu. Qualques jorns dempuèi completèri aquestas nòtas amb d’informacion de la ret, ajustèri de donadas sus tres librariás catalanas e redigiguèri lo document qu’ara sètz a legir perque me plai de lo partejar amb vosautres.
Vaquí çò que sabi, a l’ora d’ara, sus de librariás ont podèm trobar de libre occitan. De segur, los meses venents farem pus de descubèrtas e bensai l’an que ven nos caldrà far una segonda version d’aqueste document –e la farem amb plaser.
-
-
- A Montoliu (d’escais “lo Vilatge del Libre”, còsta Carcassona) i a vint ostals que son de boquinariás (librariás de vièlh); a la prima, en mes de mai, se fa una Jornada del Libre Occitan.
- A Marselha i a la Librairie Jean Laffitte Les Arcenaulx, al quartièr del chantièr (drassanes), 25, cours d’Estiènne d’Orves. I a un depaus excepcional avoat a l’istòria de Marselha e de la Provença. I a de libres ancians e tanplan de novautats.
- A Pau (Bearn) i a la librariá Marrimpoueiy, 2 Place de la Libération. Sus lo wèb se presenta coma una librariá consacrada al “regionalisme”. Aquel establiment a dos cents trenta ans d’istòria!
-
-
-
- As Ais de Provença i a las boquinariás, ont se tròba de libre occitan –malurosament, soi pas estat capable de ne localizar cap per internet.
- A Gap (departament de Nauts-Aups, dins la region de Provença- Aups-Còsta Blava) i a la Librariá Occitana, dins l’Espaci Occitan dels Aups (21, rue de l’Imprimirie).
- A Limòtges (o Lemòtges) i a la Librariá occitana (botiga de l’Institut d’Estudis Occitans dau Lemosin), 42 Rue Haute-Vienne.
- A Tolosa i a doas librariás amb de libre occitan. La mai coneguda es La Tuta d’Òc, dedicada exclusivament a la lenga, la literatura e la cultura occitanas. Es la librariá de l’Institut d’Estudis Occitans de Tolosa. Es a 11 Rue Malcousinat (linha A, Métro Esquirol). Ieu i crompi de libres e dins l’afar de paucs jorns recebi lo còlis a l’ostal. Corrièr electronic: latutadoc@ieo31.com
- L’autra librariá tolosana amb de libre occitan es la librariá de la Trinitat (“de la Trinité”), 19 Rue de la Trinité, còsta lo Musèu dels Agustins (“Musée des Augustins”).
- A Montpelhièr i a las galariás Sauramps, ont venon de libre catalan e occitan. Per i arribar, cal anar de la plaça de l’Uòu, que es ont i a lo Teatre de l’Operà e lo manètge (els “cavallitos”…), al quartièr d’Antigòna, projectat per Ricard Bofill. Aquestas galariás son plaçadas ont comença la Passejada, a l’ombra de las platanas, aquí ont los escalièrs per davalar a Antigòna començan. An quatre o cinc estatges. Vos cal demandar per la seccion del libre catalan e occitan. Aquí arriba çò publicat en Provença.
- A Vielha, las paucas librariás de la vila a pro pena an de libre occitan (la bibliotèca publica, per contra, òc qu’es ben provesida e òm i pòt manlevar de libres tre quin que siá luòc de Catalonha). D’un autre caire, l’Institut d’Estudis Aranesi-Acadèmia aranesa dera lengua occitana (Avenguda Maladeta, 2) publica de libres fòrça interessants, que son pas en venda, mas se distribuïsson a qual s’i interèssa –s’agís, doncas, de mostrar interés e profeitar d’un viatge a Aran per convenir una visita a la sedença de l’IEA.
- A Perpinhan i a La Llibreria (abans Llibreria Catalana), plaçada en 7, plaça Joan Payrà, especializada en libre catalan. En 2012 cambièt de nom e de proprietari, qu’ara es Joana Serra. I a una laissa de libre occitan (literatura e lingüistica) ont se tròban de causas fòrça interessantas.
- A Barcelona, la soleta librariá que ven de libre occitan es Alibri (l’anciana Herder, Balmes 26); i tenon una laissa escassa, jos d’autras laissas amb de libres en d’autras lengas minorizadas e aitaplan en qualques dialèctes (coma lo castuo o estremenho).
- Totun, lo melhor luòc de Barcelona per trapar de libre occitan es la sedença del CAÒC (Hotel Entitats, Providència, 42), ont i a centenats de libres en occitan en venda; de mai, i podètz far de comandas.
-
Aquò’s tot, pel moment. Se ne sabètz mai e m’o fasètz saber, vos serai plan reconeissent.
Joan Calsapeu
